• Монголын хөрөнгийн биржийн тойм.
• Монголбанк: Инфляцыг дунд хугацаанд 5%-д тогтворжуулах бодлого баримтална.
• Монгол Улсын 2027 оны Улсын төсвийн төслийг УИХ хэлэлцэж эхэллээ.
• Хиймэл оюуны салбар дахь өрийн өсөлт өгөөжийг нэмэгдүүлж байна.
• Nvidia түүхэн дэх хамгийн том хувьцаа эргүүлэн худалдан авах хөтөлбөрөө нэмэгдүүллээ.
• Дэлхийн хөрөнгийн зах зээлийн тойм

Монголын хөрөнгийн бирж дээр өнгөрсөн долоо хоногт нийт 79.15 тэрбум төгрөгийн үнийн дүнтэй 9.38 сая ширхэг үнэт цаас арилжаалагджээ. Үнийн дүнгээр Ард Даатгал ХК, Хаан банк ХК, Худалдаа Хөгжлийн банк, Эм Жи Эл Акуа ХК, Голомт Банк ХК хамгийн идэвхтэй арилжаалагдсан үнэт цааснууд байлаа. Тус хугацаанд нийт 2 удаагийн багцын арилжаа хийгдсэн байна. Тухайлбал:

• Эм Жи Эл Акуа ХК (MGLA) – 2.2 сая ширхэг үнэт цаасыг нэгжийн 282.4 үнээр, нийт 621 сая төгрөгөөр;
• Ард Даатгал ХК (AIC) – 1.2 сая ширхэг үнэт цаасыг нэгжийн 727 үнээр, нийт 881 сая төгрөгөөр тус тус арилжаалагджээ.  

Өнгөрсөн долоо хоногт Монголын хөрөнгийн зах зээлийн ихэнх голлох индексүүд өсөлттэй хаагдлаа. TOP 20 индекс 0.34%-ийн өсөлтөөр хамгийн өндөр үзүүлэлттэй байж 66,842.06 нэгжид хүрсэн бол MSE B индекс 0.3%-иар өсөж 15,342.78 нэгжид, FTI индекс 0.24%-иар өсөж 1064.85 нэгжид тус тус хүрсэн байна. Харин MSE A Индекс 0.18%-иар буурч, 26,294.73 нэгж болсон үзүүлэлттэй гарлаа.  

TOP 20 индекс өсөлт үзүүлсэн нь зах зээлийн үнэлгээ өндөр, хөрвөх чадвар сайтай компаниудын хувьцаанд эрэлт нэмэгдсэнийг илтгэж байна. Өнгөрсөн долоо хоногийн өсөлт нь банк, санхүүгийн салбарын хувьцаа ны өсөлт ихээхэн нөлөөлсөн.  

⇒  МОНГОЛБАНК: ИНФЛЯЦЫГ ДУНД ХУГАЦААНД 5%-Д ТОГТВОРЖУУЛАХ БОДЛОГО БАРИМТАЛНА

Монголбанк 2027 онд баримтлах мөнгөний бодлогын үндсэн чиглэлийн төслөө УИХ-д өргөн барьж, инфляцыг дунд хугацаанд 5% орчимд тогтворжуулах зорилтоо дахин баталгаажууллаа. Төв банкны зүгээс иргэдийн бодит орлогыг хамгаалах, үнийн өсөлтийг тогтвортой түвшинд барихын тулд мөнгөний бодлогыг тууштай хэрэгжүүлэхээ онцолсон байна.

Мөн төслийн хүрээнд инфляцтай тэмцэх ажлыг зөвхөн мөнгөний бодлогоор хязгаарлахгүй, төсвийн сахилга баттай уялдуулан хэрэгжүүлэх шинэ хандлагыг санал болгожээ. Үүний зэрэгцээ Төв банкны хуримтлагдсан алдагдал, өөрийн хөрөнгийн дутагдлыг Засгийн газрын тусгай үнэт цаасаар шийдвэрлэж, Монголбанкны хараат бус байдлыг бэхжүүлэхээр тусгасан байна.

Банк, санхүүгийн салбарын тогтвортой байдлыг хангах хүрээнд мөнгөний бодлогыг үнийн тогтвортой байдал, банкны салбарын тогтвортой байдал гэсэн үндсэн хоёр чиглэлийн хүрээнд нийт 17 бодлогын арга хэмжээ болон тэдгээрийн хэрэгжилтийг хэмжих шалгуур үзүүлэлтүүдийг тодорхойлжээ.

Тогтоолын Төсөл батлагдсанаар Монголбанкны 2026-2030 оны дунд хугацааны стратеги төлөвлөгөөг хэрэгжүүлэхээс гадна банк, санхүүгийн тогтолцооны эрх зүйн шинэчлэлийн эхлэлийг тавина гэж үзэж байна. Ерөнхийдөө Монголбанк инфляцыг 5% орчимд барих, мөнгөний болон төсвийн бодлогын уялдааг сайжруулах, санхүүгийн салбарын шинэчлэлийг эрчимжүүлэх зорилт дэвшүүлжээ.

⇒  МОНГОЛ УЛСЫН 2027 ОНЫ УЛСЫН ТӨСВИЙН ТӨСЛИЙГ УИХ ХЭЛЭЛЦЭЖ ЭХЭЛЛЭЭ

УИХ 2027 оны улсын төсвийн төслийг хэлэлцэж эхэлсэн бөгөөд төсөлд нийт 43 их наяд төгрөгийн зарлага, 40.7 их наяд төгрөгийн орлого тусгажээ. Ингэснээр төсвийн алдагдал 2.3 их наяд төгрөг буюу ДНБ-ий 2%-тай тэнцэхээр байгаа бөгөөд уг алдагдлыг Засгийн газар хөнгөлөлттэй гадаад зээл болон дотоодын үнэт цаас гаргах замаар бүрэн санхүүжүүлэхээр төлөвлөсөн байна.

Төсвийн орлого өмнөх түвшнээс 6.5 их наяд төгрөгөөр нэмэгдэхээр тооцоолсон бөгөөд үүний 3.5 их наяд төгрөгийг төрийн өмчит компаниудын ногдол ашиг, 3 их наяд төгрөгийг Оюутолгойн ногдол ашиг бүрдүүлэхээр байна.

Нэмэгдсэн орлогын дийлэнх хэсгийг иргэдийн орлого, нийгмийн халамжийг дэмжихэд зарцуулахаар төлөвлөжээ. Тухайлбал, 2.9 их наяд төгрөгийг тэтгэвэр, тэтгэмжийг нэмэгдүүлэхэд, харин 2.6 их наяд төгрөгийг төрийн албан хаагчдын цалин хөлсийг өсгөхөд зарцуулахаар тусгасан байна.

Дэлхийн хөрөнгийн зах зээлийн гол хөдөлгөгч хүчин зүйл нь АНУ-ын Засгийн газрын бондын өгөөж огцом өссөн явдал байв. Үүний улмаас бодлогын хүү өндөр түвшинд удаан хугацаанд хадгалагдаж болзошгүй гэсэн хүлээлт нэмэгдэж, хөрөнгө оруулагчдын эрсдэл хүлээх сонирхол буурсан. Харин технологи болон хиймэл оюун ухаантай холбоотой салбарууд харьцангуй сайн үзүүлэлттэй байлаа.

АНУ-д, бондын өгөөж өссөн нь зах зээлд дарамт учруулсан ч хиймэл оюун ухаантай холбоотой технологийн компаниудын өсөлт S&P 500 индексийн бууралтыг хязгаарлав.

Европт, өндөр хүү болон эдийн засгийн өсөлт саарах эрсдэлийн нөлөөгөөр хөрөнгө оруулагчид болгоомжтой байр суурь баримталж, STOXX Europe 600, DAX болон FTSE 100 индексүүд бүгд буурсан.

Азид, гүйцэтгэл харилцан адилгүй байв. Японы Nikkei 225 индекс технологийн салбарын өсөлтийн нөлөөгөөр хамгийн сайн үзүүлэлттэй байсан бол Хятад, Хонконгийн зах зээлүүд эдийн засгийн төлөв болон хөрөнгө оруулагчдын итгэл сул байснаас хамгийн их дарамтад өртөв.

Ерөнхийдөө технологийн салбар зах зээлд дэмжлэг үзүүлсэн ч өндөр хүү, өсөлтийн төлөвийн талаарх болгоомжлол дэлхийн ихэнх зах зээлд сөргөөр нөлөөлсөн.

АНУ-ЫН ХӨРӨНГИЙН ЗАХ ЗЭЭЛ

• S&P 500: +0.01%
• Dow Jones: -0.91%
• Nasdaq: +0.95%

Зах зээлд нөлөөлсөн гол хүчин зүйл нь АНУ-ын Засгийн газрын бондын өгөөж огцом өссөн явдал байв. Тухайлбал, 10 жилийн хугацаатай бондын өгөөж 5 хувиас давснаар бодлогын хүү өндөр түвшинд удаан хадгалагдаж болзошгүй гэсэн хүлээлт нэмэгдсэн. Бондын өгөөж өсөх нь ирээдүйн мөнгөн урсгалын өнөөгийн үнэ цэнийг бууруулж, хувьцааны үнэлгээнд дарамт үзүүлэхийн зэрэгцээ хөрөнгө оруулагчдыг хувьцаанаас илүү бонд руу хөрөнгө оруулахад хүргэдэг.

Үүний зэрэгцээ хиймэл оюун ухаантай холбоотой хөрөнгө оруулалтын чиг хандлага технологийн салбарт томоохон дэмжлэг үзүүлсээр байв. Бондын өгөөжийн өсөлт нийт зах зээлд сөргөөр нөлөөлсөн ч хиймэл оюун ухаан, дата төв, хагас дамжуулагч болон үүлэн тооцооллын салбарын өсөлтийн талаарх эерэг хүлээлт нь технологийн хувьцаануудыг зах зээлээс илүү сайн гүйцэтгэлтэй байлгаж, зах зээлийн уналтыг хязгаарлав.

Өндөр өгөөжтэй бонд болон аж үйлдвэрийн салбарын хувьцааны сул үзүүлэлтийн улмаас Dow Jones индекс дарамтад орсон бол хиймэл оюун ухаан болон технологийн компаниудын эрэлт тогтвортой байсан тул Nasdaq индекс харьцангуй илүү тэсвэртэй байлаа.

ЕВРОПЫН ХӨРӨНГИЙН ЗАХ ЗЭЭЛ

• FTSE 100: -2.18%
• STOXX Europe 600: -1.30%
• DAX 40: -0.84%
• CAC 40: -2.64%

Их Британийн хөрөнгийн зах зээл дэлхийн бондын өгөөж өссөн болон эдийн засгийн өсөлт саарах эрсдэлийн улмаас буурсан. FTSE 100 индекс нь эдийн засгийн мөчлөгөөс хамаарал өндөртэй салбарууд болон олон улсын үйл ажиллагаатай компаниудын жин ихтэй тул дэлхийн зах зээл дэх эрсдэлээс зайлсхийх хандлагад илүү өртөмтгий байсан.

Европын хөрөнгийн зах зээлүүд мөн сул гүйцэтгэлтэй байлаа. Хөрөнгө оруулагчид дэлхий даяар хүүгийн түвшин өсөж буй нь эдийн засгийн идэвхжил болон компаниудын ашигт хэрхэн нөлөөлөхийг үнэлж байв. Бондын өгөөж өссөнөөр эрсдэлтэй хөрөнгө оруулалтын сонирхол буурч, бүс нутгийн эдийн засгийн өсөлт цаашид саарч болзошгүй гэсэн болгоомжлол нэмэгдсэн. Үүний үр дүнд олон салбарыг хамарсан өргөн хүрээний борлуулалт явагдаж, STOXX Europe 600, DAX 40, CAC 40, болон FTSE 100 зэрэг гол индексүүд долоо хоногийг бууралтаар өндөрлүүлсэн.

АЗИЙН ХӨРӨНГИЙН ЗАХ ЗЭЭЛ

• Nikkei 225: +2.71%
• KOSPI: -0.77%
• CSI 300: -1.50%
• SSEC: -0.93%

⇒   ХИЙМЭЛ ОЮУНЫ САЛБАР ДАХЬ ӨРИЙН ӨСӨЛТ ӨГӨӨЖИЙГ НЭМЭГДҮҮЛЖ БАЙНА

Хиймэл оюуны салбарын хурдацтай өсөлтийг даган дата төв болон хиймэл оюуны загвар хөгжүүлэлтийн зардлыг санхүүжүүлэх хэрэгцээ нэмэгдэж, томоохон технологийн компаниуд өрийн санхүүжилтийг эрчимтэй нэмэгдүүлж байна. Энэ нь компанийн бондын нийлүүлэлтийг нэмэгдүүлэхийн зэрэгцээ бондын өгөөж өсөхөд нөлөөлж байна.

Шинжээчид уг өөрчлөлтийг эрэлт, нийлүүлэлтийн зарчмаар тайлбарлаж байна. Зээлийн хэрэгцээ огцом нэмэгдэх үед зээлдүүлэгчид илүү өндөр хүү шаардах боломжтой болдог бөгөөд энэ нь компанийн бондын хүү болон өгөөж өсөхөд хүргэдэг.

LSEG-ийн мэдээллээр, хиймэл оюуны салбарт тэргүүлэгч Alphabet, Amazon, Meta, Microsoft болон Oracle компаниуд дата төв болон хиймэл оюуны загвар хөгжүүлэлтийг санхүүжүүлэх зорилгоор 2026 онд нийт 220 тэрбум ам.долларын өрийн санхүүжилт татсан байна. Энэ нь эдгээр компаниудын өмнөх онд татсан нийт зээлийн хэмжээнээс хоёр дахин их үзүүлэлт юм.

Түүнчлэн ирэх саруудад технологийн компаниудын нэмэлт өрийн үнэт цаасны гаргалт үргэлжилнэ гэж үзэж байна. 2026 онд эдгээр компаниудын гаргах нийт өрийн үнэт цаасны хэмжээ ойролцоогоор 270 тэрбум ам.долларт хүрэх төлөвтэй байгаа нь 2020 оны 62 тэрбум ам.долларын түвшнээс дөрөв дахин их хэмжээ юм.

⇒   NVIDIA ТҮҮХЭН ДЭХ ХАМГИЙН ТОМ ХУВЬЦАА ЭРГҮҮЛЭН ХУДАЛДАН АВАХ ХӨТӨЛБӨРӨӨ НЭМЭГДҮҮЛЛЭЭ

NVIDIA-ийн Төлөөлөн удирдах зөвлөл хувьцаа эргүүлэн худалдан авах хөтөлбөртөө нэмэлтээр 150 тэрбум ам.доллар баталснаар компанийн үлдсэн эргүүлэн худалдан авах боломжит хэмжээ 235 тэрбум ам.долларт хүрлээ. Тус компани энэхүү хөтөлбөрийг 2028 оны санхүүгийн жилийн эцэс гэхэд хэрэгжүүлж дуусгахаар төлөвлөж байна.

Гүйцэтгэх захирал Женсен Хуан-ы хэлснээр хиймэл оюун ухаан (AI) болон хурдасгасан тооцоолол (accelerated computing) руу чиглэсэн дэлхийн шилжилт нь NVIDIA-ийн өсөлтийн гол хөдөлгөгч хүч хэвээр байна. Энэхүү томоохон хэмжээний хувьцаа эргүүлэн худалдан авах зөвшөөрөл нь дараагийн үеийн технологид хөрөнгө оруулалтаа үргэлжлүүлэхийн зэрэгцээ компанийн ирээдүйн боломжуудад удирдлагын зүгээс өндөр итгэлтэй байгааг харуулж байна.

NVIDIA-ийн хувьцааны ханш энэ долоо хоногт 2.6%-иар өсөж, дараалан гурав дахь долоо хоногтоо өсөлт үзүүлэх төлөвтэй байна.

Рекорд хэмжээний энэхүү хувьцаа эргүүлэн худалдан авах хөтөлбөр нь NVIDIA-ийн ирээдүйн ашгийн өсөлтийн чадамж болон хиймэл оюун ухаантай холбоотой эрэлтийн хүчтэй хэвээр байх төлөвт удирдлагууд итгэлтэй байгаагийн тод илрэл болж байна.