• Монголын хөрөнгийн биржийн тойм.
• FITCH Монгол Улсын зээлжих зэрэглэлийг “B+” түвшинд хэвээр үлдээж, төлөвийг “тогтвортой” гэж үнэллээ.
• 2026 оны хагас жилд ногдол ашиг хуваарилахаар зарласан компаниуд
• ДНБ 2026 оны эхний хагас жилд 7.7%-иар өсчээ.
• АНУ-ын засгийн газрын өр $40 их наяд ам.долларыг давж, төсвийн дарамт нэмэгдэв.
• AI-ийн хөрөнгө оруулалтын өсөлт үргэлжилж, зах зээлийн анхаарал өгөөж рүү шилжиж байна.
• Дэлхийн хөрөнгийн зах зээлийн тойм.

Монголын хөрөнгийн бирж дээр өнгөрсөн долоо хоногт нийт 11.4 тэрбум төгрөгийн үнийн дүнтэй 23.4 сая ширхэг үнэт цаас арилжаалагджээ. Үнийн дүнгээр Эм Жи Эл Акуа ХК, Инвескор ББСБ ХК, Хаан банк ХК, АПУ ХК болон Таван толгой ХК хамгийн идэвхтэй арилжаалагдсан үнэт цааснууд байлаа. Тус хугацаанд нийт 3 удаагийн багцын арилжаа хийгдсэн байна. Тухайлбал:

• Эм Жи Эл Акуа ХК (MGLA) – 1.63 сая ширхэг үнэт цаасыг нэгжийн 300 үнээр, нийт 489 сая төгрөгөөр;
• Эм Жи Эл Акуа ХК (MGLA) – 7.18 сая ширхэг үнэт цаасыг нэгжийн 263.82 үнээр, нийт 1.9 тэрбум төгрөгөөр;
• АПУ ХК (APU) – 490 мянган ширхэг үнэт цаасыг нэгжийн 1020 үнээр, нийт 500 сая төгрөгөөр тус тус арилжаалагджээ. 

Монголын хөрөнгийн зах зээл өнгөрсөн долоо хоногт холимог гүйцэтгэлтэй байлаа. TOP-20 индекс 1.78%-иар өсөж 56,664.44 нэгжид, MSE A индекс 1.64%-иар өсөж 21,645.31 нэгжид хүрсэн нь зах зээлийн тэргүүлэгч болон томоохон компаниудын хувьцаанд худалдан авах идэвх харьцангуй өндөр байсныг харуулж байна. Харин MSE B индекс 0.12%-иар бага зэрэг буурч 14,600.07 нэгж, FTI индекс 1.82%-иар буурч 1,063.70 нэгжид хүрэв. Ийнхүү үндсэн индексүүдийн ихэнх нь өсөлттэй байсан ч зах зээлийн бүх сегментэд өсөлт жигд бус байж, хөрөнгө оруулагчдын сонирхол томоохон болон тэргүүлэгч үнэт цаасанд илүү төвлөрсөн дүр зураг ажиглагдлаа.

⇒  FITCH МОНГОЛ УЛСЫН ЗЭЭЛЖИХ ЗЭРЭГЛЭЛИЙГ “B+” ТҮВШИНД ХЭВЭЭР ҮЛДЭЭЖ, ТӨЛӨВИЙГ “ТОГТВОРТОЙ” ГЭЖ ҮНЭЛЛЭЭ.

Fitch Ratings 2026 оны 8 дугаар сарын 19-нд Монгол Улсын урт хугацааны гадаад валютын зээлжих зэрэглэлийг “B+” түвшинд хэвээр хадгалж, төлөвийг “Тогтвортой” гэж баталгаажууллаа.

Fitch Монголын эдийн засгийн дунд хугацааны өсөлтийг эерэг хүчин зүйл гэж үзэж, 2026 онд эдийн засаг 5.6%, дунд хугацаанд ойролцоогоор 5.5%-иар өсөх төлөвтэй гэж тооцоолжээ. Уул уурхайн хөрөнгө оруулалт, Оюу Толгойн далд уурхайн олборлолт болон зэс, алтны экспорт өсөлтийн гол хөдөлгөгч хэвээр байна.

Гэсэн хэдий ч Монголын Хятадын түүхий эдийн эрэлт болон гадаад санхүүжилтээс өндөр хамааралтай байдал нь зээлжих чадварын гол эмзэг тал хэвээр байна. Мөн 2026 онд инфляц дунджаар 10%-д хүрч, төсвийн тэнцэл ДНБ-ий 2.2%-ийн алдагдалтай гарах, 2027 онд алдагдал 3.3%-д хүрэх төлөвтэй гэж үзжээ. Гадаад валютын нөөц 7 дугаар сард 8.0 тэрбум ам.долларт хүрсэн боловч урсгал дансны төлбөрийг дөрвөн сараас бага хугацаанд хангах түвшинтэй байна.

“B+ / Тогтвортой” үнэлгээ нь Монголын уул уурхайд түшиглэсэн өсөлтийн төлөвийг хүлээн зөвшөөрч байгаа ч гадаад өр, Хятадын эрэлт, төсвийн зарлага болон улс төрийн тодорхойгүй байдал зэрэг бүтцийн эрсдэлүүд зэрэглэл ахихад саад болж байгааг харуулж байна. Цаашид валютын нөөцийг нэмэгдүүлэх, төсвийн мөчлөг дагасан зарлагыг хязгаарлах, гадаад өрийн эмзэг байдлыг бууруулах нь зэрэглэл ахих гол нөхцөл болно.

⇒  2026 ОНЫ ХАГАС ЖИЛД НОГДОЛ АШИГ ХУВААРИЛАХААР ЗАРЛАСАН КОМПАНИУД

2026 оны 08-р сарын 24-ны байдлаар Монголын хөрөнгийн биржид бүртгэлтэй дараах компаниуд 2026 оны эхний хагас жилийн татварын дараах цэвэр ашиг/хуримтлагдсан ашгаас ногдол ашиг хуваарилах шийдвэрээ Төлөөлөн удирдах зөвлөлийн тогтоолоор баталж, олон нийтэд албан ёсоор мэдээллээ. 

⇒   ДНБ 2026 ОНЫ ЭХНИЙ ХАГАС ЖИЛД 7.7%-ИАР ӨСЧЭЭ.

Монгол Улсын эдийн засаг 2026 оны эхний хагас жилд 7.7%-иар өсөж, өмнөх оны мөн үеийн 5.6%-ийн өсөлтөөс эрчимжлээ. Хагас жилийн урьдчилсан гүйцэтгэлээр ДНБ ₮52.5 их наядад хүрсэн байна. Өсөлтийн гол хөдөлгөгч нь уул уурхайн салбар байсан бөгөөд 3.9 нэгж хувийг эзэлжээ. Үйлчилгээний салбар мөн өсөлтийг дэмжсэн боловч уул уурхайтай харьцуулахад өсөлтийн хурд харьцангуй сул буюу 1.8 нэгж хувиар өссөн байна.

Өнгөрсөн долоо хоногт дэлхийн хөрөнгийн зах зээлүүд нийтдээ сөрөг гүйцэтгэлтэй байлаа. АНУ, Европ болон Азийн ихэнх гол индексүүд буурсан бөгөөд ялангуяа технологийн хувьцааны жин өндөртэй зах зээлүүд илүү хүчтэй уналт үзүүлэв. Зах зээлийн бууралтад АНУ-ын бондын өгөөжийн өсөлт, технологийн хувьцаануудын үнэлгээтэй холбоотой болгоомжлол болон Ойрхи Дорнодын геополитикийн эрсдэл голлон нөлөөлсөн байна.

АНУ-ЫН ХӨРӨНГИЙН ЗАХ ЗЭЭЛ

• S&P 500: -1.49%
• Dow Jones: -0.72%
• Nasdaq: -2.26%   

Өнгөрсөн долоо хоногт АНУ-ын хөрөнгийн зах зээл нийтээрээ сул гүйцэтгэлтэй байлаа. S&P 500 индекс 1.49%, Dow Jones индекс 0.72%, Nasdaq индекс 2.26%-иар тус тус буурсан бөгөөд үүнээс технологийн хувьцаанууд давамгайлдаг Nasdaq хамгийн их уналттай байв. АНУ-ын зах зээлд Засгийн газрын урт хугацаат бондын өгөөж өсөж, газрын тосны үнэ нэмэгдсэн нь хувьцааны үнэд дарамт үзүүлсэн байна. Ялангуяа АНУ-ын 30 жилийн хугацаатай Засгийн газрын бондын өгөөж 5.3%-д хүрч, 2007 оноос хойших хамгийн өндөр түвшинд ойртсон нь өндөр үнэлгээтэй өсөлтийн болон технологийн компаниудын хувьцаанд илүү хүчтэй дарамт үзүүлжээ. Мөн AI болон технологийн хувьцааны өндөр үнэлгээтэй холбоотой болгоомжлол нэмэгдэж, Nasdaq индекс бусад индексээс илүү унасан байна. Үүнээс гадна АНУ-Ираны геополитикийн хурцадмал байдал нефтийн үнийг өсгөж, хөрөнгө оруулагчдыг эрсдэлээс зайлсхийхэд хүргэсэн харагдаж байна.

ЕВРОПЫН ХӨРӨНГИЙН ЗАХ ЗЭЭЛ

• FTSE 100: +0.62%
• STOXX Europe 600: -0.67%
• DAX 40: -1.34%
• CAC 40: -1.67%

Европын хөрөнгийн зах зээлийн хувьд холимог гүйцэтгэлтэй байлаа. Их Британийн FTSE 100 индекс 0.62%-иар өссөн бол Европын бүсийн STOXX Europe 600 индекс 0.67%, Германы DAX 40 индекс 1.34%, Францын CAC 40 индекс 1.67%-иар тус тус буурсан байна. Европын зах зээлд долоо хоногийн турш АНУ-ын урт хугацааны Засгийн газрын бондын өгөөж болон газрын тосны үнэ өндөр түвшинд хадгалагдсан нь инфляцын дарамт нэмэгдэх, улмаар мөнгөний бодлого зөөлрөх хүлээлт буурах болгоомжлолыг нэмэгдүүлж, хувьцааны зах зээлд дарамт үзүүлэв. Гэсэн хэдий ч Евро бүсийн эдийн засгийн идэвхжил хүлээлтээс сайн гарч, компанийн ашгийн үзүүлэлт харьцангуй эерэг байсан нь зах зээлийн уналтыг тодорхой хэмжээнд хязгаарласан байна. Харин FTSE 100-ийн өсөлтөд алт болон суурь металлын үнэ өссөнтэй холбоотой уул уурхайн компаниудын хувьцааны өсөлт эерэгээр нөлөөлжээ.

АЗИЙН ХӨРӨНГИЙН ЗАХ ЗЭЭЛ

• Nikkei 225: -4.16%
• KOSPI: -3.01%
• CSI 300: -1.14%
• SSEC: -0.63% 

⇒   АНУ-ЫН ЗАСГИЙН ГАЗРЫН ӨР $40 ИХ НАЯД АМ.ДОЛЛАРЫГ ДАВЖ, ТӨСВИЙН ДАРАМТ НЭМЭГДЭВ.

АНУ-ын нийт улсын өр 2026 оны 8 дугаар сарын 18-нд анх удаа $40 их наяд давж, $40.047 их наяд хүрсэн талаар АНУ-ын Сангийн яам мэдээллээ. Үүнээс $32.3 их наяд нь олон нийтэд эзэмшиж буй өр, $7.8 их наяд нь Засгийн газрын дотоод өр байна. Өрийн хэмжээ 2017 оноос хойш хоёр дахин нэмэгджээ.

Өрийн өсөлт нь зөвхөн нэрлэсэн дүнгээрээ бус, Засгийн газрын санхүүжилтийн зардлаар дамжин эдийн засагт нөлөөлж байна. 2026 оны санхүүгийн жилийн эхний 10 сард холбооны төсвийн алдагдал $1.8 их наяд хүрсэн бөгөөд долоодугаар сарын ганцаарчилсан алдагдал $432 тэрбум байсан. Үүний зэрэгцээ 30 жилийн Treasury бондын өгөөж 8 дугаар сарын дунд үед 5.216% хүрсэн нь 2001 оноос хойших хамгийн өндөр түвшнүүдийн нэг болж, хөрөнгө оруулагчид урт хугацааны Засгийн газрын өрийг эзэмшихэд илүү өндөр өгөөж шаардаж байгааг харууллаа.

Өрийн хэмжээ нэмэгдэхийн хэрээр хүүгийн төлбөр төсвийн улам том хэсгийг эзэлж, боловсрол, дэд бүтэц зэрэг бусад зарцуулалтын орон зайг хязгаарлах эрсдэлтэй. Мөн урт хугацааны Treasury-ийн өгөөж өндөр байх нь ипотекийн зээл, компанийн санхүүжилт болон бусад зээлийн өртөгт дамжин нөлөөлөх боломжтой. Зах зээлд өндөр өр, төсвийн алдагдал, инфляцын эрсдэл зэрэг нь Treasury-ийн өгөөжийг нэмэгдүүлэхэд нөлөөлж байна.

$40 их наядын босго нь өөрөө эдийн засгийн хямрал эхэлснийг илэрхийлэхгүй боловч АНУ-ын төсвийн урт хугацааны тогтвортой байдлын асуудлыг улам тодотгож байна. Өрийн хэмжээ өсөхийн зэрэгцээ хүүгийн зардал нэмэгдэж, урт хугацааны бондын өгөөж өндөр хэвээр байвал Засгийн газрын дахин санхүүжилтийн өртөг өсөх бөгөөд энэ нь мөнгөний бодлогын уян хатан байдал болон хувийн хэвшлийн зээлийн нөхцөлд дарамт үүсгэх эрсдэлтэй.

⇒  AI-ИЙН ХӨРӨНГӨ ОРУУЛАЛТЫН ӨСӨЛТ ҮРГЭЛЖИЛЖ, ЗАХ ЗЭЭЛИЙН АНХААРАЛ ӨГӨӨЖ РҮҮ ШИЛЖИЖ БАЙНА.