• Монголын хөрөнгийн биржийн тойм.
• Монгол Улсын валютын нөөц 7.19 тэрбум ам.долларт хүрч, түүхэн дээд түвшинд хүрлээ.
• Үнэт цаасны зах зээлийн гүйлгээ 74.4%-иар өссөн ч өсөлт нь анхдагч зах зээл төвтэй хэвээр байна.
• Ам.доллар, газрын тосны үнэ өссөнөөр инфляцын хүлээлт нэмэгдэж, алтны ханш буурлаа.
• БНХАУ-ын аж үйлдвэрийн ашиг 15.2%-иар өссөн ч сэргэлт жигд бус, эрсдэлүүд хадгалагдсаар байна.
• Дэлхийн хөрөнгийн зах зээлийн тойм.

Монголын хөрөнгийн бирж дээр долоо хоногийн хугацаанд нийт 24.73 тэрбум төгрөгийн үнийн дүн бүхий 45.55 сая ширхэг үнэт цаас арилжаалагджээ.Үүнээс Инновэйшн инвестмент ХК, Хаан банк ХК, АПУ ХК, Голомт Банк ХК болон Мандал Даатгал ХК арилжааны үнийн дүнгээр тэргүүлсэн байна. Тус хугацаанд нийт 4 удаагийн багцын арилжаа зохион байгуулагджээ. Тодруулбал:  

• Инвескор ББСБ ХК-ийн (INV) 26.7 мянган ширхэг үнэт цаас нэгжийн 11,110 төгрөгөөр буюу нийт 296.6 сая төгрөгөөр;  
• Тэнгэр Даатгал ХК-ийн (TGI) 625 мянган ширхэг үнэт цаас нэгжийн 800 төгрөгөөр буюу нийт 500 сая төгрөгөөр;
• Инновэйшн инвестмент ХК-ийн (QPAY) 33.1 сая ширхэг үнэт цаас нэгжийн 270 төгрөгөөр буюу нийт 8.9 тэрбум төгрөгөөр;
• Мандал Даатгал ХК-ийн (MNDL) 6.6 сая ширхэг үнэт цаас нэгжийн 75 төгрөгөөр буюу нийт 495 сая төгрөгөөр тус тус арилжаалагдсан байна.

Өнгөрсөн долоо хоногийн байдлаар Монголын хөрөнгийн биржийн индексүүд бууралттай хаагдлаа. TOP-20 индекс -2.03%, MSE A индекс -4.66%, MSE B индекс -0.75%-иар тус тус буурсан нь зах зээлд өргөн хүрээний сулрал ажиглагдсаныг харуулж байна. Ялангуяа MSE A индексийн огцом бууралт нь том болон дунд зах зээлийн үнэлгээтэй компаниудын ханшид илүү дарамт үүссэнийг илтгэж байна. Энэ долоо хоногийн хөдөлгөөнд улирлын шинжтэй хүчин зүйлс нөлөөлсөн.

Компаниудын ногдол ашиг тараахтай холбоотойгоор экс-дивиденд хугацаанд орж, үүний нөлөөгөөр хувьцааны үнэ техникийн шалтгаанаар буурах хандлага ажиглагддаг. Мөн хувьцаа эзэмшигчдийн хурлын тов зарлагдаж, бүртгэл эхэлсэн нь хөрөнгө оруулагчдын богино хугацааны шийдвэрт тодорхой хэмжээгээр нөлөөлсөн байна. Нийт дүнгээр, индексүүдийн бууралт нь зах зээлд системийн шинжтэй огцом эрсдэлээс илүүтэйгээр улирлын шинжтэй болон зах зээлийн дотоод хөдөлгөөнтэй холбоотой сулрал давамгайлсныг илэрхийлж байна.

⇒  МОНГОЛ УЛСЫН ГАДААД ВАЛЮТЫН НӨӨЦ ТҮҮХЭН ДЭЭД ТҮВШИНД ХҮРЛЭЭ

Монгол Улсын гадаад валютын албан нөөц 2026 оны 1 дүгээр улирлын эцсийн байдлаар 7.19 тэрбум ам.долларт хүрч, оны эхнээс 182.5 сая ам.доллароор нэмэгдэн түүхэн дээд түвшинд хүрлээ.

Нөөцийн энэ түвшин нь эдийн засгийн гадаад тэнцвэрийг хангах чадамж сайжирч байгааг илтгэж байгаа бөгөөд олон улсын жишиг үзүүлэлтүүдийг хангаж байна. Тодруулбал, валютын нөөц нь:

• Валютын төлбөртэй барааны импортын 8.4 сарын хэрэгцээг,
• Нийт бараа, үйлчилгээний импортын 5.6 сарын хэрэгцээг,
• Богино хугацаат гадаад өр төлбөрийн 275%-ийг тус тус хангах түвшинд байна.

Гадаад валютын нөөц нэмэгдэж, түүхэн дээд түвшинд хүрсэн нь макро эдийн засгийн тогтвортой байдал, гадаад шокыг шингээх чадамжийг дэмжих эерэг хүчин зүйл болж байна. Нөөцийн хангалттай түвшин нь төгрөгийн ханш, төлбөрийн тэнцэлд үүсэх богино хугацааны дарамтыг бууруулах суурь нөхцөлийг бүрдүүлж байна.

⇒  ҮНЭТ ЦААСНЫ ЗАХ ЗЭЭЛИЙН ГҮЙЛГЭЭ 74.4%-ИАР ӨСӨЖ, АНХДАГЧ ЗАХ ЗЭЭЛ ИДЭВХЖИВ

2026 оны эхний хоёр сарын байдлаар Монголын үнэт цаасны зах зээлийн нийт гүйлгээ 188.3 тэрбум төгрөгт хүрч, өмнөх оны мөн үеэс 80.3 тэрбум төгрөгөөр буюу 74.4%-иар өссөн байна. Энэхүү өсөлт нь зах зээлд идэвхжил нэмэгдэж байгааг илтгэж байгаа бөгөөд ялангуяа анхдагч зах зээлийн гүйлгээ огцом өссөнөөр голлон дэмжигджээ.

Нийт гүйлгээний 56.7% буюу 106.7 тэрбум төгрөгийг анхдагч зах зээл, харин 43.3% буюу 81.6 тэрбум төгрөгийг хоёрдогч зах зээл бүрдүүлсэн нь шинэ гаргалт, санхүүжилтийн үйл ажиллагаа зах зээлд давамгайлж байгааг харуулж байна.

Харин арилжсан үнэт цаасны тоо 85.0 сая ширхэг болж, өмнөх оны мөн үеэс 60.6%-иар буурсан нь гүйлгээний өсөлт нь тоо хэмжээ бус, үнэлгээ өндөртэй хэрэгслүүдийн арилжаа нэмэгдсэнтэй холбоотой байж болохыг илтгэж байна.

Бүтцийн хувьд, нийт гүйлгээний:

• 41.5% – Хөрөнгөөр баталгаажсан үнэт цаас
• 23.8% – Хувьцаа
• 21.6% – Засгийн газрын бонд
• 13.0% – Компанийн бонд

байгаа нь зах зээлд өрийн хэрэгслийн эзлэх байр суурь өндөр хэвээр байгааг харуулж байна.
 
Зах зээлийн үнэлгээ 2026 оны 2-р сарын байдлаар 14.0 их наяд төгрөгт хүрч, жилийн дүнгээр 4.3%-иар өссөн ч сарын дүнгээр 1.7%-иар буурсан байна. Мөн TOP-20 индекс жилийн дүнгээр өссөн боловч сарын дүнгээр буурсан нь богино хугацаанд зах зээлийн засвар явагдаж байгааг илтгэж байна.

Гол үзүүлэлтүүд:

• Нийт гүйлгээ: 188.3 тэрбум төгрөг (+74.4% YoY)
• Анхдагч зах зээл: 106.7 тэрбум төгрөг (56.7%)
• Хоёрдогч зах зээл: 81.6 тэрбум төгрөг (43.3%)
• Арилжсан үнэт цаас: 85.0 сая ширхэг (-60.6% YoY)
• Зах зээлийн үнэлгээ: 14.0 их наяд төгрөг (+4.3% YoY)

Гүйлгээний огцом өсөлт нь зах зээлд санхүүжилтийн идэвхжил нэмэгдэж байгааг илтгэж байгаа бөгөөд анхдагч зах зээлийн үүрэг нэмэгдэж буйг харуулж байна. Харин арилжааны хэмжээ буурсан нь хөрвөх чадварын гүнзгийрэл бус, харин бүтэц өөрчлөгдөж, өндөр дүнтэй хэлцлүүд давамгайлж байгааг илэрхийлж байна. Нийтдээ зах зээлд өсөлт ажиглагдаж байгаа ч хоёрдогч зах зээлийн идэвх сул хэвээр байгаа нь цаашдын тогтвортой өсөлтөд анхаарах шаардлагатай хүчин зүйл хэвээр байна.

Долоо хоногийн дүнгээр дэлхийн хөрөнгийн зах зээлүүд өргөн хүрээний өсөлттэй байж, өмнөх бууралтын дараах сэргэлтийн үе шат ажиглагдлаа. АНУ болон Европт өсөлт хүчтэй байсан бол Азид ихэвчлэн эерэг, гэхдээ жигд бус гүйцэтгэл үргэлжилсэн байна. Энэ нь зах зээлүүдэд богино хугацаанд эрсдэл буурч, хөрөнгө оруулагчдын байр суурь илүү идэвхжиж байгааг илтгэж байгаа ч бүс нутгуудын хоорондын ялгаа хадгалагдсан хэвээр байна.

АНУ-ЫН ХӨРӨНГИЙН ЗАХ ЗЭЭЛ

• S&P 500: +2.80%
• Dow Jones: +2.70%
• Nasdaq: +3.71%

АНУ-ын зах зээл долоо хоногийн турш эерэг гүйцэтгэл үзүүлж, гол индексүүд өсөлттэй хаагдлаа. S&P 500 +2.80%, Nasdaq +3.71%, Dow Jones +2.70%-иар тус тус өссөн байна. Ялангуяа Nasdaq-ийн илүү өндөр өсөлт нь өсөлтийн болон технологийн хувьцаануудын сэргэлт давамгай байсныг харуулж байна. Өмнөх долоо хоногийн бууралтын дараа зах зээлд өсөлт ажиглагдаж, хөрөнгө оруулагчдын богино хугацааны эрсдэлээс зайлсхийх хандлага сулран, худалдан авалт идэвхжсэн долоо хоног байв.

ЕВРОПЫН ХӨРӨНГИЙН ЗАХ ЗЭЭЛ

• FTSE 100: +3.04%
• STOXX Europe 600: +3.86%
• DAX 40 (Герман): +4.30%
• CAC 40 (Франц): +3.55%

Европын зах зээлүүд өргөн хүрээний өсөлттэй байж, бүс нутгийн бүх гол индексүүд хүчтэй гүйцэтгэл үзүүллээ. DAX 40 +4.30%, STOXX Europe 600 +3.86%, CAC 40 +3.55%, FTSE 100 +3.04%-иар өссөн байна. Энэ нь бүс нутгийн зах зээлд эрсдэлийн дуршил нэмэгдэж, салбаруудын өргөн оролцоотой өсөлт явагдсаныг илтгэнэ. Өсөлт нь зөвхөн нэг сегментэд төвлөрөөгүй, харьцангуй жигд тархсан шинжтэй байв.

АЗИЙН ХӨРӨНГИЙН ЗАХ ЗЭЭЛ

• Nikkei 225: +2.05%
• KOSPI: +3.77%
• CSI 300: +0.38%
• SSEC : -0.11%

Азийн зах зээлүүд ихэвчлэн эерэг гүйцэтгэлтэй байлаа. Өмнөд Солонгосын KOSPI +3.77%, Японы Nikkei 225 +2.05%-иар өссөн нь бүс нутгийн гол зах зээлүүдэд сэргэлт ажиглагдсаныг харуулж байна. Харин Хятадын зах зээл харьцангуй сул хэвээр байж, CSI 300 +0.38%-ийн бага өсөлттэй, SSEC -0.11%-иар буурсан нь зах зээлд тодорхойгүй байдал үргэлжилж байгааг илтгэж байна.

⇒  АЛТНЫ ХАНШ БУУРЧ, ДОЛЛАР БОЛОН ТОСНЫ ҮНИЙН ӨСӨЛТ ДАРАМТ ҮЗҮҮЛЖ БАЙНА

Алтны ханш пүрэв гарагт буурч, ам.долларын ханш болон газрын тосны үнэ өссөнтэй холбоотойгоор дарамтад орлоо. Спот алт 3.6%-иар буурч $4,587.55/унц хүрсэн бол АНУ-ын алтны фьючерс 2.7%-иар буурч $4,679.70 болсон байна.
 
Энэхүү хөдөлгөөн нь АНУ-ын Ерөнхийлөгч Дональд Трамп Ираны эсрэг цэргийн ажиллагааг үргэлжлүүлэх тухай мэдэгдэл хийсний дараа ажиглагдсан бөгөөд зах зээлд инфляцын дарамт нэмэгдэх, улмаар хүү өндөр түвшинд хадгалагдах хүлээлт нэмэгдсэнтэй холбоотой байна.
 
Ам.долларын ханш огцом чангарсан нь бусад валют эзэмшигчдийн хувьд алтны үнийг харьцангуй үнэтэй болгож, эрэлтийг бууруулжээ. Мөн газрын тосны үнэ өссөн нь инфляцын дарамтыг нэмэгдүүлж, төв банкуудын бодлогын хүүг бууруулах боломжийг хязгаарлах хүчин зүйл болж байна.
 
Алт нь инфляцын эсрэг хамгаалах хэрэгсэлд тооцогддог ч өндөр хүүгийн орчинд өгөөж үүсгэдэггүй онцлогоос шалтгаалан харьцангуй сонирхол буурдаг. Үүний үр дүнд алтны ханш Ирантай холбоотой зөрчил эхэлсэн 2-р сарын 28-наас хойш нийт 13%-иар буурсан байна.
 
Мөн Туркийн төв банк алтны нөөцөө 69.1 тонн-оор бууруулж 702.5 тонн болгосон нь зах зээлийн сэтгэл зүйд нэмэлт дарамт үзүүлжээ. Сүүлийн хоёр долоо хоногт нийт бууралт 118 тонн давсан байна.
 
Азийн зах зээлд алтны эрэлт харьцангуй ялгаатай байлаа. Энэтхэгт үнэ буурсантай холбоотойгоор алт урамшуулалтай (premium) арилжаалагдаж эхэлсэн бол Хятадад худалдан авагчид цаашдын бууралтыг хүлээж, урамшуулал бага зэрэг буурсан байна.
 
Алтны ханшийн бууралт нь ам.долларын чангарч, газрын тосны үнийн өсөлтөөр дамжин инфляц болон хүүний хүлээлт нэмэгдсэнтэй шууд холбоотой байна. Одоогийн нөхцөлд алт нь хамгаалах хэрэгсэл гэхээс илүүтэйгээр хүүний орчноос хамааралтай актив болж, богино хугацаанд дарамттай хэвээр байх төлөв ажиглагдаж байна.
 

⇒  БНХАУ-ЫН АЖ ҮЙЛДВЭРИЙН АШИГ 15.2%-ИАР ӨСӨЖ, СЭРГЭЛТ ҮРГЭЛЖИЛЖ БАЙНА

2026 оны эхний хоёр сарын байдлаар БНХАУ-ын аж үйлдвэрийн салбарын ашиг өмнөх оны мөн үеэс 15.2%-иар өссөн ба энэ нь 2025 оны 12-р сард бүртгэгдсэн 5.3%-ийн өсөлтөөс эрс нэмэгдсэн үзүүлэлт бөгөөд үйлдвэрлэлийн идэвхжил нэмэгдэж байгааг илтгэж байна.

Албаныхны мэдээлснээр өсөлтөд үйлдвэрийн үйл ажиллагаа идэвхжсэн, мөн бүтээгдэхүүний үнэ өссөн нь голлон нөлөөлжээ. Ялангуяа өндөр технологийн үйлдвэрлэлийн салбар ашигт ажиллагаагаараа тэргүүлж, нийт ашиг 58.7%-иар өссөн байна. Үүнд дрон болон хагас дамжуулагч үйлдвэрлэгч компаниудын орлогын өсөлт голлон нөлөөлсөн байна. Түүхий эдийн салбар мөн хүчтэй гүйцэтгэл үзүүлж, өнгөт металлын салбарын ашиг 148.2%, химийн салбарын ашиг 35.9%-иар тус тус өссөн байна.

Гэсэн хэдий ч эдийн засгийн сэргэлт салбаруудын хувьд жигд бус хэвээр байгааг онцолж, геополитикийн хурцадмал байдал нэмэгдэх нь өсөлтийн төлөвт сөргөөр нөлөөлж болзошгүйг анхааруулжээ.

Мөн Ойрхи Дорнод дахь нөхцөл байдлаас шалтгаалан газрын тосны нийлүүлэлт тасалдаж, дэлхийн эрчим хүчний зах зээлд дарамт үүсч байгаа ч БНХАУ-ын хувьд дотоод нөөц, альтернатив эх үүсвэрүүдийн ачаар нөлөөлөл харьцангуй хязгаарлагдмал байх төлөвтэй байна. Түүнчлэн Иранаас газрын тосны нийлүүлэлт үргэлжилж байгаа нь эрсдэлийг тодорхой хэмжээнд бууруулж байна.

Аж үйлдвэрийн ашиг өссөн нь богино хугацаанд үйлдвэрлэлийн идэвхжил сайжирч байгааг илтгэж байна. Гэсэн хэдий ч дотоодын эрэлт сул, салбаруудын сэргэлт жигд бус байгаа нь өсөлтийн тогтвортой байдалд эргэлзээ үлдээж байна. Геополитикийн эрсдэл болон эрчим хүчний үнийн хэлбэлзэл цаашдын гүйцэтгэлд нөлөөлөх гол хүчин зүйл хэвээр байна.