• Монголын хөрөнгийн биржийн тойм.
• Рио Тинто болон Монгол Улсын Засгийн газар Оюу Толгойн хувьцаа эзэмшигчийн зээлийн хүүг тохируулах тохиролцоонд хүрлээ.
• Монголбанк "Unlock the Mongolian Economy" өргөтгөсөн хуралдаанд амжилттай оролцлоо.
• СЗХ-ны 2026-2029 оны стратеги төлөвлөгөө батлагдлаа.
• АНУ-ын хөдөлмөрийн зах зээлийн хүлээлтэд хүрээгүй үзүүлэлт холбооны нөөцийн сан зээлийн хүүг хэвээр үлдээх магадлалыг нэмэгдүүлэв.
• Apple-ийн шинэ загварын утасны төлөвлөгөө компанийн зах зээлийн үнэлгээг 210 тэрбум ам.доллараар өсгөж, AI дэд бүтцийн эргэлзээ чип үйлдвэрлэгчдэд дарамт үзүүлэв.
• Дэлхийн хөрөнгийн зах зээлийн тойм.

Монголын хөрөнгийн бирж дээр өнгөрсөн долоо хоногт нийт 13.3 тэрбум төгрөгийн үнийн дүнтэй 5.6 сая ширхэг үнэт цаас арилжаалагджээ. Үнийн дүнгээр Голомт Банк ХК, Хаан Банк ХК, Инвескор ББСБ ХК, Ард Санхүүгийн Нэгдэл ХК болон Эм Жи Эл Акуа ХК тэргүүлсэн бол энэ хугацаанд нийт 3 удаагийн багцын арилжаа хийгджээ. Тухайлбал:

• Голомт Банк ХК-ийн (GLMT) 500 мянган ширхэг үнэт цаасыг нэгжийн 1285 төгрөгөөр, нийт 736.6 сая төгрөгөөр; үнэт цаас 250 сая төгрөгийн үнийн дүнтэй;
• Инвескор ББСБ ХК-ийн (INV) 30,865 ширхэг үнэт цаасыг нэгжийн 8,100 төгрөгөөр, нийт 250.0 сая төгрөгөөр; үнэт цаас 291.5 сая төгрөгийн үнийн дүнтэй;
• Эм Жи Эл Акуа ХК-ийн (MGLA) 1.1 сая ширхэг үнэт цаасыг нэгжийн 215 төгрөгөөр, нийт 250.0 сая төгрөгөөр; үнэт цаас 250 сая төгрөгийн үнийн дүнтэй тус тус арилжаалагджээ.

Монголын хөрөнгийн биржийн индексүүд долоо хоногийг уналттай өндөрлүүллээ. TOP-20 индекс 1.43%-иар буурч 51,773.38 нэгжид хүрсэн нь тэргүүлэгч хувьцаанд эрэлт сулран, ашиг авалт давамгайлсныг харууллаа. MSE A индекс 0.28%-иар буурч, дунд ангиллын компаниудын хувьцаанд мөн бага зэргийн худалдан борлуулалт ажиглагдсаныг илэрхийлж байна. MSE B индекс 0.56%-иар буурч, жижиг үнэлгээтэй компаниудын хувьцаанд арай илүү хэмжээний ашиг авалт хийгдсэнийг харуулав. Харин FTI индекс цорын ганц эерэг гүйцэтгэлтэй байж, 0.18%-иар өссөн нь хөрөнгө оруулалтын сангийн нэгж эрхүүдийн үнэлгээ харьцангуй тогтвортой, бүр бага зэрэг өссөнийг илтгэж байна.

Нийт дүнгээр зах зээлийн хөдөлгөөнөөс харахад хөрөнгө оруулагчид ерөнхийдөө эрсдэлээс татгалзаж, ялангуяа тэргүүлэгч болон томоохон үнэлгээтэй компаниудын хувьцаанаас гарах хандлага давамгайлсан бол хөрөнгө оруулалтын сангийн бүтээгдэхүүнүүд харьцангуй тогтвортой байдлыг хадгалсан дүр зураг ажиглагдлаа.

⇒  РИО ТИНТО БОЛОН МОНГОЛ УЛСЫН ЗАСГИЙН ГАЗАР ОЮУ ТОЛГОЙН ХУВЬЦАА ЭЗЭМШИГЧИЙН ЗЭЭЛИЙН ХҮҮГ ТОХИРУУЛАХ ТОХИРОЛЦООНД ХҮРЛЭЭ

Рио Тинто компани болон Монгол Улсын Засгийн газар Оюу Толгойн төслийн хувьцаа эзэмшигчийн зээлийн хүүг тохируулах талаар тохиролцоонд хүрлээ. Мөн Entrée уурхайн талбайн эзэмшлийн асуудлыг цаг тухайд нь шийдвэрлэхээр хамтран ажиллахаар тохиролцож, ногдол ашиг хуваарилах хугацааг урагшлуулахаар шийдэв.

• Тохиролцооны цар хүрээ: зээлийн хүү тохируулах, Entrée-ийн эзэмшлийн асуудал шийдвэрлэх, ногдол ашгийн хугацаа урагшлуулах 
• Уурхайн үйлдвэрлэлийн зорилт (2028-2036): жилд дунджаар ~500 мянган тонн зэс
• Ажилтны тоо: ~17,000 (97.8% нь монгол ажилтан)
• Улсын төсөвт төвлөрүүлсэн татвар, хураамж (2010 оноос хойш): 6.1 тэрбум ам.доллар

Рио Тинто -гийн Зэсийн салбарын Гүйцэтгэх захирал Кэти Жексон энэ тохиролцоог 5 дугаар сард удирдлагын хөлсний талаар хүрсэн зарчмын тохиролцоотой хамтад нь Оюу Толгойн урт хугацааны амжилт, талуудын түншлэлийн амлалтыг харуулж байна хэмээн тэмдэглэв.
Хөрөнгийн зах зээлийн хувьд энэ нь төслийн санхүүгийн тогтвортой, ил тод байдлыг нэмэгдүүлж, эрсдэлийг бууруулан гадаадын хөрөнгө оруулагчдын итгэлийг цаашид бэхжүүлэх хандлагатай байна. 

⇒  МОНГОЛБАНК "UNLOCK THE MONGOLIAN ECONOMY" ӨРГӨТГӨСӨН ХУРАЛДААНД АМЖИЛТТАЙ ОРОЛЦЛОО

Ерөнхий сайдын дэргэдэх Эдийн засгийн зөвлөлийн зохион байгуулсан "Unlock the Mongolian economy" өргөтгөсөн хуралдаан 2026 оны 6 дугаар сарын 29-30-ны өдрүүдэд амжилттай зохион байгуулагдлаа. Уг хуралдаанд Монголын хувийн хэвшлийн төлөөллийн зэрэгцээ гадаадын 120 гаруй хөрөнгө оруулагч оролцов.

• Хуралдааны нийт хэмжээ: 545 сая ам.доллар (гарын үсэг зурсан гэрээ, санамж бичгийн нийт өртөг)
• Гарын үсэг зурсан баримт бичгийн тоо: 6
• Оролцсон гадаадын хөрөнгө оруулагчид: 120 гаруй
• Шинэ оролцогчид: Singapore-ийн Phillip Capital сан, Унгарын OTP банк

Хуралдааны эхний өдөр талууд хөрөнгө оруулалтын хамтын ажиллагааны зургаан гэрээ, санамж бичигт гарын үсэг зурснаас гадна Сингапурын Phillip Capital сан Монголд оффисоо нээхээр шийдвэрлэсэн бөгөөд Унгарын OTP банк Монголд салбар байгуулах хүсэлтээ Ерөнхий сайд Н.Учралд гардуулсан нь гадаадын банк санхүүгийн байгууллагуудын дотоодын зах зээлд үзүүлж буй сонирхол нэмэгдэж байгааг илтгэлээ.

OTP банкны ТУЗ-ийн гишүүн Ласло Вольф банкныхаа зүгээс Монголын зах зээлд ажиллах болвол томоохон төслүүдэд санхүүжилт олгох, ипотекийн бүтээгдэхүүн санал болгох сонирхолтой байгаагаа илэрхийлсан ба одоогийн эрх зүйн орчныг бүрэн таатай гэж дүгнэхэд эрт байгаа ч Засгийн газар, Монголбанк холбогдох хууль эрх зүйг либералчлах бодлого хэрэгжүүлж эхэлсэн нь тэдний хувьд боломжийг нэмэгдүүлж байгааг тэмдэглэв.

Хуралдаан нийтдээ хөрөнгө оруулалтын орчныг сайжруулах, бүсийн болон олон улсын хамтын ажиллагааг өргөжүүлэх, төр-хувийн хэвшлийн шинэ боломжуудыг тодорхойлох зорилготойгоор амжилттай явагдсан бөгөөд гадаадын санхүүгийн байгууллагуудын Монголын зах зээлд үзүүлж буй сонирхол өсөж байгаа нь дотоодын хөрөнгийн болон банкны салбарт цаашид эерэгээр нөлөөлөх хандлагатай байна.
 

⇒   СЗХ-НЫ 2026-2029 ОНЫ СТРАТЕГИ ТӨЛӨВЛӨГӨӨ БАТЛАГДЛАА

Санхүүгийн зохицуулах хороо нь зохицуулалтын салбаруудын хөгжлийг дэмжин, олон нийтийн итгэлийг хүлээсэн тогтвортой санхүүгийн зах зээлийн тогтолцоог бий болгох зорилгын хүрээнд "Стратеги төлөвлөгөө 2026-2029"-ийг шинэчлэн баталлаа. Уг төлөвлөгөө нь 3 тэргүүлэх чиглэл, 6 стратегийн зорилгын хүрээнд нийт 40 арга хэмжээг хамарч байна.

• Тэргүүлэх чиглэл 1: Санхүүгийн зах зээлийн тогтвортой хөгжлийг хангах

Санхүүгийн зах зээлийн гүнзгийрэлтийг нэмэгдүүлэх зорилгоор холбогдох хууль тогтоомжийг шинэчлэн боловсруулах, хөрөнгө оруулагч болон хэрэглэгчийн эрх ашгийг хамгаалах эрх зүйн орчныг бэхжүүлэх арга хэмжээнүүд тусгагдсан. Мөн үл хөдлөх хөрөнгийн хөрөнгө оруулалтын сан (REIT)-ийн эрх зүйн орчныг бүрдүүлэх, ногоон болон тогтвортой санхүүгийн бүтээгдэхүүнийг дэмжих, санхүүгийн технологийн инновацыг хөгжүүлэх зэрэг чиглэлүүдэд анхаарал хандуулна. Санхүүгийн дэд бүтцийг сайжруулах хүрээнд кибер аюулгүй байдлын эрх зүйн орчныг боловсронгуй болгох, эрсдэлд суурилсан хяналт зохицуулалтын шинэ арга хэрэгслийг нэвтрүүлэх, зах зээлийн мэдээллийн хүртээмжийг нэмэгдүүлэх зорилтууд дэвшүүлжээ.

• Тэргүүлэх чиглэл 2: Олон нийтийн итгэлийг нэмэгдүүлэх

Зах зээлд оролцогчдын засаглал, чадавхыг бэхжүүлэх замаар системийн эрсдэлээс урьдчилан сэргийлэхэд чиглэсэн арга хэмжээнүүд багтсан байна. Тодруулбал, компанийн засаглалын эрх зүйн орчныг боловсронгуй болгох, мөнгө угаах болон терроризмыг санхүүжүүлэхтэй тэмцэх үйл ажиллагааг олон улсын жишигт нийцүүлэх, санхүүгийн байгууллагуудын чадавхыг бэхжүүлэх зэрэг зорилтууд тусгагджээ. Үүнтэй зэрэгцэн хүний нөөц, санхүү, үйл ажиллагааны шаардлагыг оновчтой болгох чиглэлээр мэргэжлийн сургалтын чанарыг сайжруулах, зохицуулалтын байгууллагуудын хүний нөөцийн нэгдсэн мэдээллийн санг бүрдүүлэх арга хэмжээнүүд хэрэгжинэ.

• Тэргүүлэх чиглэл 3: Тасралтгүй хөгждөг байгууллага байх

Хорооны байгууллагын чадавх, нэр хүндийг нэмэгдүүлэх зорилгоор Санхүүгийн зохицуулах хорооны эрх зүйн байдлыг шинэчлэх, мэргэшсэн албан хаагчдыг бэлтгэх, дотоод аудитын үйл ажиллагааг олон улсын стандартад нийцүүлэх, их өгөгдөл болон хиймэл оюун ухаанд суурилсан судалгаа шинжилгээний арга хэрэгслийг нэвтрүүлэх зэрэг арга хэмжээнүүд тусгагдсан. Салбар хоорондын уялдаа холбоог сайжруулах хүрээнд гадаад болон дотоодын байгууллагуудтай хамтын ажиллагааг өргөжүүлэх, хамтарсан төсөл, хөтөлбөрүүдийг хэрэгжүүлэх зорилтууд дэвшүүлжээ.

Энэхүү стратеги төлөвлөгөөг амжилттай хэрэгжүүлснээр санхүүгийн зах зээлийн эрх зүйн болон зохицуулалтын орчин улам боловсронгуй болж, дэвшилтэт технологид суурилсан шинэ бүтээгдэхүүн, үйлчилгээ хөгжих таатай нөхцөл бүрдэх төлөвтэй байна. Мөн эрсдэлд суурилсан хяналт зохицуулалтын тогтолцоо бүрэн төлөвшиж, санхүүгийн салбарын тогтвортой байдал бэхжих юм.

Өнгөрсөн долоо хоногт дэлхийн хөрөнгийн зах зээлүүдэд эрсдэлийн дуршил сэргэж, ихэнх томоохон индексүүд өсөлттэй гарлаа. Мөнгөний бодлогын тодорхойгүй байдал зах зээлд дарамт учруулсаар байгаа хэдий ч геополитикийн хурцадмал байдал буурч, эрчим хүчний үнэ тогтвортой байсан нь хөрөнгө оруулагчдын итгэлийг нэмэгдүүлсэн байна. Ялангуяа Европын зах зээл хамгийн хүчтэй өсөлтийг үзүүлсэн бол Азийн зах зээлүүд холимог гүйцэтгэлтэй байлаа.

АНУ-ЫН ХӨРӨНГИЙН ЗАХ ЗЭЭЛ

• S&P 500: +1.40%                       
• Dow Jones: +1.82%     
• Nasdaq: +0.59%       

АНУ-ын хөрөнгийн зах зээл долоо хоногийг өсөлтөөр өндөрлүүллээ. Dow Jones индекс хамгийн хүчтэй гүйцэтгэлийг үзүүлж, эдийн засгийн тогтвортой байдал болон компаниудын ашгийн тайлангийн эерэг үр дүн зах зээлийг дэмжив. S&P 500 мөн адил өсөлттэй байсан бол Nasdaq харьцангуй сул, гэхдээ эерэг гүйцэтгэлтэй байлаа. Өндөр үнэлгээтэй технологийн хувьцаанд хандах болгоомжлол хэвээр байгаа ч томоохон худалдан авалт ажиглагдав. Холбооны Нөөцийн Сангийн бодлогын хүүгийн талаарх тодорхойгүй байдал үргэлжилсэн ч хөрөнгө оруулагчид ерөнхийдөө эрсдэлтэй хөрөнгөд эргэн орсон нь долоо хоногийн эерэг гүйцэтгэлд хувь нэмэр оруулав.

ЕВРОПЫН ХӨРӨНГИЙН ЗАХ ЗЭЭЛ

• FTSE 100: +1.56%
• STOXX Europe 600: +2.78%
• DAX 40 (Герман): +4.28%
• CAC 40 (Франц): +1.54%   

Европын хөрөнгийн зах зээл долоо хоногийн турш хамгийн хүчтэй гүйцэтгэлийг үзүүллээ. Германы DAX 40 индекс дэлхийн томоохон зах зээлүүдийн дунд тэргүүлж, эрчим хүчний үнийн бууралт болон экспортын чиглэлтэй компаниудын эерэг мэдээлэл индексийг өсгөв. STOXX Europe 600 бүс нутгийн өргөн хүрээний өсөлтийг илэрхийлж, банк болон аж үйлдвэрийн салбарууд голлон дэмжлэг үзүүлэв. FTSE 100 болон CAC 40 мөн адил эерэг гүйцэтгэлтэй байсан бол хөрөнгө оруулагчид Европын Төв банкны бодлогын чиглэл болон инфляцын мэдээллийг цаашид анхааралтай ажиглах төлөвтэй байна.

АЗИЙН ХӨРӨНГИЙН ЗАХ ЗЭЭЛ

• Nikkei 225: +1.18%  
• KOSPI: -1.49%   
• CSI 300: -0.59% 
• SSEC : +0.24%

Азийн хөрөнгийн зах зээл долоо хоногийн турш холимог гүйцэтгэлтэй байлаа. Японы Nikkei 225 индекс иений ханшийн тогтвортой байдал болон экспортын чиглэлтэй компаниудын дэмжлэгтэйгээр өсөлттэй дүнгээр амжилттай гарлаа. Харин Өмнөд Солонгосын KOSPI индекс технологи болон хагас дамжуулагчийн салбарын хувьцааны борлуулалттай холбоотойгоор бүс нутгийн дундаж гүйцэтгэлээс доогуур байв. Хятадын CSI 300 индекс мөн сул, харин SSEC бага зэргийн эерэг гүйцэтгэлтэй байсан нь үл хөдлөх хөрөнгийн салбарын сул байдал болон эдийн засгийг дэмжих шинэ бодлогын хүлээлт хоёрын хооронд тэнцвэржиж буйг харуулж байна.

⇒  АНУ-ЫН ХӨДӨЛМӨРИЙН ЗАХ ЗЭЭЛИЙН ХҮЛЭЭЛТЭД ХҮРЭЭГҮЙ ҮЗҮҮЛЭЛТ ХОЛБООНЫ НӨӨЦИЙН САН ЗЭЭЛИЙН ХҮҮГ ХЭВЭЭР ҮЛДЭЭХ МАГАДЛАЛЫГ НЭМЭГДҮҮЛЭВ

АНУ-ын хөдөлмөрийн зах зээлийн 6-р сарын тайлан энэ долоо хоногт цацагдсаны дараа хөрөнгийн зах зээл дээрх индекс бүр харилцан адилгүй хариу үзүүлэв. Шинжээчид 113–115 мянган ажлын байр шинээр бий болно хэмээн таамаглаж байсан боловч энэ сард АНУ-д ердөө 57 мянган шинэ ажлын байр бий болж таамаглалаас хавьгүй доогуур үзүүлэлт гарсан нь Холбооны Нөөцийн Сан бодлогын хүүгээ дахин өсгөхөөс илүүтэйгээр одоогийн түвшинд хадгалах магадлалтай гэсэн хүлээлтийг нэмэгдүүлэв.  Харин ажилгүйдлийн түвшин 4.3%-аас 4.2% болж бага зэрэг буурсан байна.

Энэ мэдээллийн дараа Dow Jones Industrial Average индекс ойролцоогоор 600 нэгж буюу 1.14%-иар өсөж, 52,900 нэгж орчимд хүрснээр түүхэн дээд хаалтын түвшнээ шинэчиллээ. Харин S&P 500 индекс бараг өөрчлөлтгүй хаагдсан бол Nasdaq индекс технологийн салбарын дарамтаас шалтгаалан ойролцоогоор 1%-иар буурсан байна.

Ялангуяа хагас дамжуулагчийн салбарын хувьцаанууд хоёр дахь өдрөө дараалан огцом унасан бөгөөд энэ нь Өмнөд Солонгосын Kospi индекс нэг өдөртөө 7–7.9%-иар огцом буурсантай холбоотойгоор хөрөнгө оруулагчид хиймэл оюун ухаанд суурилсан хөрөнгө оруулалтын өсөлтийн мөчлөг хэр удаан үргэлжлэх талаар болгоомжлох болсонтой холбоотой юм. Үүний улмаас AMD, Micron, Intel зэрэг чип үйлдвэрлэгчдийн хувьцааны ханш үргэлжлэн буурч, харин Tesla улирлын автомашины нийлүүлэлтийн үзүүлэлт нь таамгийг давсан хэдий ч хувьцааны ханш нь ойролцоогоор 7%-иар унав.

Холбооны Нөөцийн Сангийн дарга Кевин Уорш зах зээлд бодлогын хүүгийн ирээдүйн чиглэлийг зөвхөн төв банкны мэдэгдэл бус, эдийн засгийн бодит үзүүлэлтүүдэд үндэслэн үнэлэхийг зөвлөсөн. 6-р сарын хөдөлмөрийн зах зээлийн сул үзүүлэлт нь сүүлийн гурван сарын хүчтэй өсөлтийн дарааллыг тасалдуулж, ХНС ойрын хугацаанд бодлогын хүүгээ өөрчлөхгүй байх магадлалыг улам нэмэгдүүлж байна.

Нөгөөтээгүүр, зах зээл дэх тодорхойгүй байдал нэмэгдэхийн хэрээр хөрөнгө оруулагчид дахин аюулгүй хөрөнгө оруулалтын хэрэгслүүдийг эрэлхийлэх хандлага ажиглагдаж байгаа учир бодлогын хүүгийн талаарх хүлээлтийн нөлөөгөөр алтны ханш өсөлтөө хадгалах төлөвтэй байна. 
 

⇒  APPLE-ИЙН ШИНЭ ЗАГВАРЫН УТАСНЫ ТӨЛӨВЛӨГӨӨ КОМПАНИЙН ЗАХ ЗЭЭЛИЙН ҮНЭЛГЭЭГ 210 ТЭРБУМ АМ.ДОЛЛАРААР ӨСГӨЖ, AI ДЭД БҮТЦИЙН ЭРГЭЛЗЭЭ ЧИП ҮЙЛДВЭРЛЭГЧДЭД ДАРАМТ ҮЗҮҮЛЭВ

7-р сарын 4-ний өдөр Apple компанийн хувьцааны ханш 4.84%-иар өссөн нь тус компани энэ онд 10 сая ширхэг эвхэгддэг iPhone үйлдвэрлэхээр төлөвлөж байгаа тухай мэдээлэлтэй холбоотой байв. Шинэ загварын нэг төхөөрөмж ойролцоогоор 2,500 ам.долларын үнэтэйгээр худалдаалагдах төлөвтэй байгаа бөгөөд үүний үр дүнд Apple-ийн зах зээлийн үнэлгээ нэг өдрийн дотор ойролцоогоор 210 тэрбум ам.доллароор нэмэгдэж, нийт үнэлгээ нь 4.54 их наяд ам.долларт дөхсөн бөгөөд үнэ-ашгийн (P/E) харьцаа нь 37-д хүрлээ. Хөрөнгө оруулагчид зөвхөн шинэ бүтээгдэхүүнээс гадна Apple-ийн төхөөрөмжүүдийн шинэчлэлтийн дараагийн мөчлөг эхлэх боломжийг өндрөөр үнэлж байгаа бололтой.

Харин Apple-ийн хувьцааны өсөлт технологийн салбарын ерөнхий төлөвөөс нэлээд ялгаатай байлаа. Meta Platforms компани илүүдэл AI тооцооллын хүчин чадлаа худалдахаар төлөвлөж буйгаа мэдэгдсэнээр хөрөнгө оруулагчдын дунд хиймэл оюун ухааны дэд бүтцэд хэт их хөрөнгө оруулалт хийгдсэн байж болзошгүй гэсэн болгоомжлол нэмэгдэв. Үүний улмаас AMD, Micron, Intel зэрэг хагас дамжуулагч үйлдвэрлэгчдийн хувьцааны ханш хоёр дахь өдрөө дараалан буурлаа. Мөн Өмнөд Солонгосын Kospi индекс энэ долоо хоногт огцом унаснаар зах зээл AI-д суурилсан хөрөнгө оруулалтын өсөлт цаашид одоогийн эрчээрээ үргэлжлэх эсэхэд эргэлзэж эхэлснийг илтгэж байна.

Хэдийгээр зарим салбаруудад савлагаа нэмэгдсэн ч зах зээлийн суурь үзүүлэлтүүд харьцангуй тогтвортой хэвээр байна. Тавдугаар сарын үйлдвэрийн захиалгын хэмжээ хүлээлтээс бага хэмжээгээр буурсан бол Bloomberg Intelligence-ийн тооцоолсноор S&P 500 индексэд багтдаг компаниудын хоёрдугаар улирлын ашиг өмнөх оны мөн үеэс 23%-иар өсөх төлөвтэй байгаа бөгөөд энэхүү өсөлтийн бараг 60%-ийг AI дэд бүтцийн хөрөнгө оруулалт бүрдүүлэхээр байна.

Үүний зэрэгцээ дэлхийн нийлүүлэлт нэмэгдэж буйтай холбоотойгоор газрын тосны үнэ сүүлийн дөрвөн сараас дээших хугацааны хамгийн доод түвшинд хүрч буурсан нь инфляцын дарамтыг тодорхой хэмжээнд сааруулах эерэг хүчин зүйл болж байна. Гэсэн хэдий ч Ираны эсрэг өмнөх цэргийн ажиллагаатай холбоотойгоор үүссэн инфляцын эрсдэл буюу зах зээлд “Trumpflation” хэмээн нэрлэгддэг эрсдэл бүрэн арилаагүй хэвээр байна.